नेपालगञ्ज । बाँकेमा दादुरा संक्रमितको संख्या १८० पुगेको छ । नेपालगञ्जमा १७६, खजुरामा ३ र कोहलपुरमा १ जना संक्रमित भेटिएका छन् ।
बाँकेमा देखिएका संक्रमितमध्ये शनिबारसम्म १३१ जना निको भएका छन । त्यस्तै ४४ जना संक्रमित घरमै आइसोलेसनमा रहेका छन् । शनिबार नेपालगञ्जमा २० जनामा संक्रमण देखिएको छ । नेपालगञ्जका १५ वटा वडामा दादुरा फैलिसकेको छ ।
यसका साथै नियन्त्रणका लागि संचालन भएको खोप अभियान प्रगतिमा बढिरहेको छ । २२ गतेदेखि शुरु भएको खोप अभियानमार्फत लक्षितको ७५.२१ प्रतिशतलाई खोप लगाइएको स्वास्थ्य कार्यालय बाँकेका खोप फोकल पर्सन नरेश श्रेष्ठले जानकारी दिनुभयो ।
नेपालगञ्जका दादुरा प्रभावित वडाका लक्षित २२ हजार १ सय ९० जनसंख्यामध्ये शनिबारसम्म १६ सय ६ सय ८९ जनाले खोप लगाएका छन् । शनिबारमात्रै ३ हजार ८ सय ४४ बालबालिकाले खोप लगाएको नेपालगञ्ज उपमहानगरपालिकाका खोप फोकल पर्सन जागेश्वर बस्नेतले बताउनुभयो ।
पुस १२ गते दादुरा देखिएको नेपालगञ्जमा २२ गतेदेखि खोप अभियान चलिरहेको छ । ६ महिनादेखि १५ बर्षसम्मका बालबालिकालाई दादुरा रुबेला विरुद्धको खोप लागाइएको छ । दादुराका कारण एक जना अढाई बर्षीय बालकले ज्यान गुमाइसकेका छन् ।
