नेपालगन्ज । बाँके जिल्ला अदालतमा कार्यरत नायब सुब्बा राम प्रसाद धमलाबिरुद्ध विशेष अदालत, काठमाडौंमा भ्रष्टाचार गरेकाे भन्दै आरोपपत्र दायर भएको छ ।
मुद्दा मिसिल अभिलेख फाँट “क” मा कार्यरत नायब सुब्बा धमलाले फैसलाको प्रतिलिपि दिने प्रयोजनार्थ सेवाग्राहीसँग घुस वापत १२ हजार रुपैयाँ लिएको अवस्थामा अख्तियारले पक्राउ गरेको थियो ।
अख्तियार दुरुपयोग अनुसन्धान आयोगले सोमबार भ्रष्टाचार निवारण ऐन, २०५९ अनुसार आरोपपत्र दायर गरेको हो । उजुरी निवेदनका आधारमा अख्तियार कार्यालय, बुटवल, सम्पर्क कार्यालय नेपालगन्जबाट खटिएको टोलीले धमलालाई पक्राउ गरेको थियो ।
आयोगका प्रवक्ता राजेन्द्र कुमार पौडेलले विभिन्न बहाना बनाई सुब्बा धमलाले सेवाग्राहीसँग घुस माग गरी लिएको अनुसन्धानबाट देखिएको बताउनुभयो ।
उक्त कार्य भ्रष्टाचार निवारण ऐन, २०५९ को दफा ३ को उपदफा (१) बमोजिमको कसूर भएको हुँदा धमलासंग बिगो रकम कायम गरी भ्रष्टाचार निवारण ऐन, २०५९ को दफा ३ को उपदफा (१) को देहाय (क) बमोजिम कैद र सोही ऐनको दफा ३ को उपदफा (१) अनुसार बिगो बमोजिम जरिवाना सजाय हुन मागदाबी गरिएको प्रवक्ता पौडेलले बताउनुभयो ।
