खजुरा । बाँकेको खजुरामा क्रियाशील संस्था आदर्श युवा सञ्जालको तेस्रो अधिवेशनले खगेन्द्र दाहालको नेतृत्वमा नयाँ कार्यसमिति चयन गरिएको छ ।
दुई वर्षे कार्यकाल रहने गरी अधिवेशनले उपाध्यक्षमा सुबास निरौला, सचिवमा गम बहादुर डाँगर, सह सचिवमा संदेश गुरुङ, कोषाध्यक्षमा दीपेन्द्र शाही निर्विरोध चयन भएको मुख्य निर्वाचन अधिकृत विक्रम गिरीले जानकारी दिनुभयाे ।
यस्तै सदस्यहरुमा सविना देवकोटा दाहाल, दाताराम पौडेल, संदेश रानाभाट र प्रेम घिमिरे निर्विरोध चयन हुनुभएको छ । अध्यक्षमा निर्विरोध निर्वाचित भएपछि दाहालले संस्थाले खजुरामा आगामी दिनमा सरकारका कामको निरन्तर निगरानी, सामाजिक कार्यमा सक्रिय, खेलकुददेखि सांस्कृतिक, शिक्षा, स्वास्थ्य क्षेत्रमा पैरवी गर्ने कार्य गर्ने उल्लेख गर्नुभयाे ।
कल्पना तामाङको अध्यक्षतामा भएको तेस्रो अधिवेशनका प्रमुख अतिथि खजुरा गाउँ पालिका अध्यक्ष डम्बर बहादुर विकले खजुराको विकासमा युवाको भूमिका महत्वपूर्ण रहेको बताउनुभयाे ।
पालिका अध्यक्ष विकले आदर्श युवा सञ्जाल मार्फत भएका सामाजिक कार्य प्रसनिय रहेको उल्लेख गर्नुभयाे । अध्यक्ष विकले स्थानीय सरकार सञ्जालको गतिविधिमा सहकार्य गर्न तयार गरेको बताउनुभयाे ।
उहाँले युवाले नै पछिल्ला कार्यक्रमहरू सञ्चालन गर्न सक्ने बताउँदै समाज रुपान्तरणमा युवाले योगदान दिन आग्रह गर्नुभयाे । कार्यक्रममा न्यू डाँफे स्पोर्ट्स क्लब खजुराका अध्यक्ष बालाराम खत्रीले खजुरामा युवा एकजुट भएर सामाजिक कार्य गर्न जरुरी रहेको बताउनुभयाे ।
उहाँले पछिल्ला दिनमा खजुराका युवाहरुको सक्रियतामा विभिन्न सचेतनामुलकदेखि खेल तथा सांस्कृतिक गतिविधि भएको उल्लेख गर्नुभयाे ।
सहायताका लागि सहयोगी हातहरु संस्थाका अध्यक्ष पुष्पा सुनारले खजुरामा अधिकांश संस्था युवाले हाकेको स्मरण गराउँदै स्थानीय सरकार लगायत सरोकारवाला निकायले सहकार्य गर्न जरुरी रहेको बताउनुभयाे । अधिवेशनमा मुख्य निर्वाचन अधिकृत विक्रम गिरी, निर्वाचन अधिकृत बालवीर थापा, हरी निरौला रहनुभएकाे थियाे ।
