नेपालगन्ज । बाँकेको डुडुवा गाउँपालिकामा बिहीबार पोषण तथा खाद्य सुरक्षा निर्देशक समितिको बैठक बसेर विभिन्न निर्णय गरेको छ । गाउँपालिका कार्यालयमा बसेको बैठकले पोषण तथा खाद्य सुरक्षा सुधारका लागि आवश्यक निर्णयहरु गरेको हो ।
बैठकले तीन वटा विषयमा निर्णय गरेको गाउँपालिका उपाध्यक्ष साहिदा बानोले जानकारी दिनुभयो । उहाँका अनुसार पालिकामा पोषण सुधारको कार्यमा सहयोग पु¥याउनका लागि पोषण सहजकर्ता भर्ना गर्ने, एकिकृत पोषण कार्य योजना तयार गर्ने र पोषणमैत्री स्थानीय शासन कार्यान्वयन गर्ने बिषयमा निर्णय गरिएको हो ।
कार्यक्रमलाई सम्बोधन गर्दै उपाध्यक्ष बानोले पालिकामा पोषणको अवस्था सुधारका लागि आफुहरु लागिरहेको बताउनुभयो । उहाँले यद्दपी पालिकाको जिम्मेवारी भएपनि सबै क्षेत्रका व्यक्तिहरु पनि लाग्न उत्तिकै जरुरी रहेको बताउनुभयो ।
‘एक जनाले मात्रै गरेर दिगो हुन सक्दैन त्यसका लागि अभिभावक, घरका मूलीलगायत सबै लाग्नुपर्छ,’ उपाध्यक्ष बानोले भन्नुभयो, ‘मानिसको दिमागमा नै जबसम्म पोषणका बारेमा जानकारी भएन भएन भने खाद्य सुरक्षा पनि हुन सक्दैन ।’
महिला शाखा डुडुवाकी लिलावती यादवले बाल विकास हेर्ने शिक्षकको जिम्मेवारी र मेहनतलाई पोषण तथा खाद्य सुरक्षामा जोड्दै उहाँहरुको योगदानलाई पनि पोषण सुधारमा प्रयोग गर्न सकिने बताउनुभयो । पोषण तथा खाद्य सुरक्षाका बारेमा बहुक्षेत्रीय पोषण योजना तेस्रो लुम्बिनी प्रदेशका संयोजक नर बहादुर बिश्वकर्माले जानकारी प्रस्तुत गर्नुभएको थियो ।
बैठकमा वडाअध्यक्ष, स्वास्थ्य शाखा लगायत कर्मचारीहरुको उपस्थिति रहेको थियो । बैठकले पालिकास्तरीय खाद्य सुरक्षा निर्देशक समितीको बैठक बहुक्षेत्रिय पोषणको योजना, तेस्रोमा पोषणमैत्री स्थानिय शासनको अभिमूखीकरण र वहुक्षेत्रिय पोषण योजना आ.व ०८२-०८३ को एकिकृत योजना निर्माण गरिएको निर्णय गरेको छ ।
यस्तै पोषणमैत्री स्थानिय शासन कार्यान्वयमका लागि अभिमुखीकरण (जनप्रतिनिध) विषयगत शाखा प्रमुख र स्वास्थ्यकर्मीकलाई तालिमको लागि पोषण कार्यक्रम बी ग्रुपलाई अनुरोध गर्ने निर्णय गरिएको जनाइएको छ ।
