नेपालगञ्ज । नेपाली कांग्रेस बाँकेले नरैनापुरमा तत्काल इलाका प्रशासन कार्यालय पुनःस्थापना गर्न माग गरेको छ ।
कांग्रेस बाँकेका सभापति नारायणप्रसाद गौडेलको नेतृत्वमा जिल्ला प्रशासन कार्यालयमा पुगेको एक टोलीले नरैनापुरमा तत्काल इलाका प्रशासन कार्यालय पुनःस्थापनाका लागि प्रमुख जिल्ला अधिकारी सूर्य बहादुर खत्रीलाई ज्ञापनपत्र बुझाएको हो ।
प्रजिअ खत्रीलाई ज्ञापनपत्र बुझाउँदै सभापति गौडेलले नरैनापुरका जनता सरल, सहज र छिटो छरितो सेवा पाउने अधिकारबाट बञ्चित भएको भन्दै एक साताभित्र नरैनापुरमा इलाका प्रशासन कार्यालय पुनःस्थापना गर्न ध्यानाकर्षण गराउनुभयो ।
नागरिकता लगायत सामान्य प्रशासनिक कामका लागि लामो दुरी तय गरेर नेपालगञ्ज आउनुपर्ने बाध्यता स्थानीयले ब्यहोर्नुपरेको औंल्याउँदै सभापति गौडलले नरैनापुरबासीलाई झञ्झटिलो अवस्थाबाट छुटकारा दिन वडा नम्बर ५ मटेहियामा तत्काल इलाका प्रशासन कार्यालय पुनःस्थापना हुनुपर्ने बताउनुभयो ।
कांग्रेस क्षेत्र नम्बर १ का क्षेत्रीय सभापति पोषण केसीले पहिले भन्दा परिस्थिति सबै कोणबाट अहिले सहज बनिसकेकाले नरैनापुर गाउँपालिका र राप्तीसोनारीका गाउँपालिकाका ६ र ७ नम्बर वडाका बासिन्दालाई समेत पायक पर्ने हिसाबले अबिलम्ब इलाका प्रशासन कार्यालय नरैनापुरमा पुनःस्थापना गर्न प्रजिअ खत्रीको ध्यानाकर्षण गराउनुभयो ।
ज्ञापनपत्र बुझ्दै प्रजिअ खत्रीले छिटो भन्दा छिटो नरैनापुरको उपयुक्त स्थानमा इलाका प्रशासन कार्यालय पुनःस्थापना गरिने बताउनुभयो ।
‘तपाईंहरुको माग छिटो भन्दा छिटो सम्बोधन हुने गरी पहल गरिरहेका छौं, गृह मन्त्रालयमा कर्मचारी माग गरिसकेका छौं, कर्मचारीको व्यवस्था भयो भने यथाशक्य नरैनापुरको उपयुक्त स्थानमा कार्यालय पुनःस्थापना गर्छौं, ‘ प्रजिअ खत्रीले भन्नुभयो ।
त्यसक्रममा नेपाली कांग्रेसका महासमिति सदस्य एवम् नरैनापुर ५ का वडा अध्यक्ष कृष्णचन्द्र मौर्यले कार्यालयका लागि आफ्नो निजी भवन पाँच महिनासम्म निःशुल्क उपलब्ध गराउने समेत बताउनुभयो ।
ज्ञापनपत्र बुझाउन कांग्रेस बाँके सभापति गौडेल, क्षेत्र नम्बर १ का क्षेत्रीय सभापति केसी, लुम्बिनी प्रदेश कमिटी सदस्य टेकनारायण भुषाल, इशाक जोलाहा, बाँकेका उपसभापति गोपालप्रसाद अधिकारी, सहसचिव विनोदकुमार थारु, प्रदेश १ (क) का सभापति लक्ष्मण थारु, क्षेत्र नम्बर १ का क्षेत्रीय सचिव खुमबहादुर बस्नेत, क्षेत्र नम्बर १ का निवर्तमान सचिव डिल्ली गिरी, नरैनापुर पालिका सभापति मेराज अहमद खाँ, नरैनापुर गाउँपालिका वडा नम्बर ५ का वडा अध्यक्ष मौर्य, कोहलपुर नगर सचिव गोविन्द वाग्ले लगायत नेता कार्यकर्ता पुग्नुभएको थियो ।
यसअघि नरैनापुरमा रहेको इलाका प्रशासन कार्यालय हटाई केही बर्षदेखि नेपालगञ्जबाटै सेवा सञ्चालन भइरहेको छ ।
