ठाकुरबाबा । अब हाम्रो पालोः हाम्रो अधिकार, हाम्रो भविष्य नारा सहित देशभर ११ औं अन्तर्राष्ट्रिय बालिका दिवस मनाईएको छ ।
बालिका दिवसको अवसरमा आज बर्दिया जिल्लाको ठाकुरबाबा नगरपालिकाका शिक्षा, युवा तथा खेलकुद शाखाका प्रमुखको पद आज ठाकुरबाबा नगरपालिका वडा नंं ४ को परिवर्तनका सम्वाहक (सिओसी) कक्षाको १५ बर्षीया सलिना चौधरीले सम्हाल्नुभएको छ ।
सो पद सम्हाल्दै चौधरीले ठाकुरबाबा नगरपालिकाका किशोरीहरुको लागि सम्पुर्ण विद्यालयहरुमा स्वस्थ खाजाको ब्यवस्था र सेनेटेरी प्याडको निःशुल्क व्यवस्था गरिने प्रतिबद्धता जनाउनुभयो ।
ठाकुरबाबा नगरपालिकाका शिक्षा, युवा तथा खेलकुद शाखाका प्रमुख सिता कुमारी भण्डारीले आफनो पद हस्तान्तरण गर्नुभएको थियो ।
त्यसैगरि आज नै ठाकुरबाबा नगरपालिको वडा नं.५ मा अवस्थित सिओसी कक्षाका १८ बर्षीया जुनमाया थारुले बगनाहा स्वास्थ्यचौकीको प्रमुख पद सम्हाल्नुभएको छ ।
स्वास्थ्यचौकीका प्रमुख ओम चुनाराले आफनो पद हस्तान्तरण गर्नु भएको थियो । सो पद सम्हाल्दै जुनमाया थारुले विद्यालयहरुमा निःशुल्क स्वास्थ्य चेकजाँचको ब्यवस्था गरिने प्रतिबद्धता जनाउनुभयो ।
सो कार्यक्रमका प्रमुख अतिथि ठाकुरबाबा नगरपालिकाका मेयर तिलकराम लम्सालले समग्र विकासको लागि पालिकाले १० बर्षे गुरुयोजना निर्माण गरि अगाडि बढेको र विद्यालयमा किशोरीहरुको शिक्षाको निरन्तरताको लागि शिक्षाको क्षेत्रमा बजेट विनियोजन गरेको तथा बालबालिकाहरुलाई सुरक्षित वातावरण सिर्जना गर्न पहल गरिएको बताउनुभयो ।
त्यसैगरि प्रमुख प्रशासकिय अधिकृत रामहरि रिजालले ठाकुरबाबा नगरपालिकाले किशोरी तथा बालिकाहरुको शिक्षामा पहुँच पु¥याउनका लागि विद्यालयहरुमा महिनावारी ब्यवस्थापन कक्ष, खानेपानी तथा सरसफाईको उचित ब्यवस्था गरिएको बताउनुभयो ।
त्यसै गरि ठाकुरबाबा नगरपालिकाका उपमेयर विना कुमारी भट्टराईले बालिका दिवसको अवसरमा सम्पुर्ण बालिका तथा किशोरीहरुलाई बधाई तथा शुभकामना दिँदै बालिकाहरुलाई सबैभन्दा शिक्षामा निरन्तरता दिनुपर्ने बताउनुभयो ।
अन्तर्राष्ट्रिय बालिका दिवसको अवसरमा बर्दिया जिल्लामा पनि ‘गर्ल्स टेक ओभर’ कार्यक्रम भेरी वातावरणीय विशिष्टता समुह(बी–ग्रुप) र सामाजिक सचेतन सरोकार मन्च (स्याक नेपाल) को सहकार्यमा संचालन भइरहेको छ ।
प्लान इन्टरनेशनलको स्टेट अफ त वल्र्डले सार्वजनिक गरेको अध्ययन प्रतिवेदन अनुसार नेपालका किशोरी र युवा महिलाहरु स्थानीय र राष्ट्रिय दुवै तहमा राजनीतिक सहभागिताको लागि इच्छुक रहेको देखाएको छ ।
सर्वेक्षणमा भाग लिएका मध्ये ९० प्रतिशत बढीले राजनीतिमा सहभागी हुनु महत्वपूर्ण भएको, ९२ प्रतिशत किशोरी र युवा महिलाहरुले राजनीतिमा सहभागी भएको केही अनुभव रहेको पाइएको छ ।
रिपोर्ट अनुसार २९ वटा देशका सबै क्षेत्र, आयस्रोतको अवस्था र नागरिक जीवनको परिस्थिति अनुसार १५ देखि २४ वर्ष उमेर समूहका गरी २९ हजार किशोरी तथा महिला माझ सर्वेक्षण गरेर तयार पारिएको प्रतिवेदनमा उल्लेख गरिएको छ ।
किशोरीहरुले भोगिरहेको संरचनात्मक विभेद विरुद्ध स्थानीय, प्रादेशिक र संघीयस्तरमा किशोरी र बालिकाका सवालमा जिम्मेवार व्यक्ति तथा संस्थाहरुलाई ज्ञापनपत्र बुझाएका छन् ।
किशोरीहरुले ९ बुँदे ज्ञापनपत्रमा शक्तिमा साझेदारी (इक्वेल पावर नाउ) भन्ने ध्येयका साथ किशोरीको अधिकार, किशोरी र युवा महिलाका राजनीतिक अधिकार र राजनीतिमा किशोरी र बालिकाका मुद्दाहरुमा गम्भीर हुन अनुरोध समेत गरेका छन् ।
