नेपालगञ्ज । नेपालले साफ यू-१५ महिला च्याम्पियनसिपको उपाधि जितेको छ । डवल राउन्ड रोविन लिगको अन्तिम खेलमा शुक्रबार घरेलु टोली बंगलादेशलाई १-१ गोलको बराबरीमा रोक्दै नेपालले पहिलो पटक उपाधि जितेको हो ।
नेपालका लागि सुशिला केसीले गोल गर्नुभयो । बंगलादेशका लागि रुमा अख्तरले बराबरी गोल फर्काउनुभएको थियो । पहिलो हाफमै १-० ले अग्रता लिएको नेपालले दोस्रो हाफमा उक्त अग्रता जोगाउन भने सकेन ।
ढाकास्थित बीएस एस एस एमके स्टेडियममा खेलको १४ औं मिनेटमा सुशिला केसीले गोल गर्दै नेपाललाई सुरूआती अग्रता दिलाउनुभएको थियो ।
अन्तिम मिनेटमा नेपालले पेनाल्टी बचाएपछि उपाधि नेपालको पक्षमा गएको हो । त्यसअघि ५४ औं मिनेटमा बंगलादेशका लागि रुमा अख्तरले बराबरी गोल गर्नुभएको थियो ।
विपना स्नेहीले पेनाल्टी एरियामा बल ह्यान्ड गरेपछि प्राप्त पेनाल्टीमा बंगलादेश गोल गर्न चुकेको थियो । प्रतियोगितामा अपराजित नेपालले चार खेलबाट ३ जित र एक बराबरीसहित १० अंक जोडेको छ ।
आयोजक बंगलादेश २ जित र १ बराबरीसहित सात अंकमा सीमित रहदै दोस्रो भयो । तीन टिम सम्मिलित प्रतियोगितामा भुटान अंकविहीन स्थितिमा पुछारमा रह्यो ।
नेपालले यसअघि बंगलादेशविरुद्धको पहिलो खेलमा १-० को जित निकालेको थियो भने भुटान विरूद्ध १-० र ७-० को जित निकालेको थियो ।
