कोहलपुर । थारु आदिवासी जनजातिहरुको अधिकार स्थापित गर्न काँग्रेसले ऐतिहासिक र महत्वपूर्ण भूमिका निर्वाह गरेको थारु अगुवाहरुले बताएका छन् ।
आगामी फागुन २१ गते हुने प्रतिनिधिसभा निर्वाचनलाई लक्षित गर्दै नेपाल थारु संघ बाँकेले बुधवार कोहलपुरमा आयोजना गरेको अन्तरक्रिया तथा छलफल कार्यक्रममा थारु समुदायले उठाएका मुद्दाहरु काँग्रेस नेतृत्वकै सरकारले मात्र सम्बोधन गर्न सकेको दावी गरे ।
थारु समुदायका अगुवाहरुले आफ्नो राजनीतिक धार स्पष्ट पार्दै भने हाम्रो साथ काँग्रेसलाई छ । थारु समुदायको अधिकार, पहिचान, सम्मान र भविष्यका सवालमा काँग्रेस विकल्पविहीन पार्टी भएको नेपाल थारु संघका केन्द्रीय सचिव फुलाराम थारुको भनाइ थियो । थारुले भन्नुभयो,–‘काँग्रेस नेतृत्वको सरकारले मात्रै थारु समुदायको अधिकारलाई संविधानमा सुनिश्चित गरेको हो ।’
उहाँले संविधान निर्माण प्रक्रियामा काँग्रेसको भूमिकालाई ऐतिहासिक भन्दै त्यसलाई संरक्षण र कार्यान्वयनको जिम्मेवारी पनि काँग्रेसकै काँधमा रहेको तर्क गर्नुभयो । ‘अहिले मुलुक अत्यन्तै विषम परिस्थितिबाट गुज्रिरहेको छ,’ उहाँले भन्नुभयो,–‘आर्थिक संकट, बेरोजगारी, सामाजिक असन्तुलन र राजनीतिक अस्थिरताले जनजीवन प्रभावित छ । यस्तो अवस्थामा काँग्रेस बाहेकको कुनैपनि राजनीतिक दलले निकास दिन सक्दैन ।’
काँग्रेस बाँकेकी सचिव सञ्जु कुमारी थारुले आदिबासी समुदायको अधिकार संविधानमा सुनिश्चित भएपनि कार्यान्वयन गर्न पनि काँग्रेसकै नेतृत्व अपरिहार्य रहेको बताउनुभयो । उहाँले नीति निर्माण तहमा थारु समुदायको प्रभावकारी उपस्थिति आवश्यक रहेको औंल्याउँदै मतदातालाई आग्रह गर्दै भन्नुभयो, ‘हाम्रो आवाजलाई संसदसम्म पु¥याउन काँग्रेस उम्मेदवारलाई जिताउनुपर्छ ।’
थारु अगुवा लाहुराम थारुले थारु समुदायका समस्यालाई दीर्घकालीन रुपमा समाधान गर्नु काँग्रेसको जिम्मेवारी भएको बताउनुभयो । ‘सुकुम्बासी तथा मुक्तकमयैयाहरुको समस्या अझै समाधान भएको छैन’ उहाँले भन्नुभयो, -‘भूमिहीनता र व्यवस्थापनको विषय थारु समुदायका लागि संवेदनशील मुद्दा हो । यो काँग्रेसकै नेतृत्वमा मात्र सम्भव छ ।’
त्यस्तै, अर्का अगुवा लक्ष्मण थारुले थारु समुदाय ऐतिहासिक रुपमा काँग्रेससँग निकट रहेको स्मरण गराउँदै भन्नुभयो–‘थारुहरु अहिले पनि काँग्रेसकै पक्षमा छन् ।’ उहाँले थारु समुदायलाई अवसर प्रदान गर्न र नेतृत्वमा पहुँच बढाउन आग्रह गर्नुभयो । कार्यक्रममा प्रतिनिधि सभा क्षेत्र नम्बर १ का उम्मेदवार नारायण प्रसाद गौडेलले आदिबासी थारु समुदायको हकअधिकारलाई कार्यान्वयन गर्नु आफ्नो दायित्व भएको बताउनुभयो ।
उहाँले २६ वर्षपछि क्षेत्र नम्बर १ मा काँग्रेसको विरासत फर्काउने अवसर आएको उल्लेख गर्दै सबैलाई ‘रुख’ चिन्हमा मतदान गर्न आग्रह गर्नुभयो । ‘पहिला काँग्रेस जिताउनुहोस् उहाँले भन्नुभयो,–‘विकास निर्माणका लागि के–के गर्नुपर्छ, त्यसका लागि म आफैँ खटिन्छु ।’ आफूलाई ‘भुइँमान्छे’का रुपमा प्रस्तुत गर्दै उहाँले चुनाव जितेपछि पनि गाउँमै बसेर नागरिकको सुखदुःखमा साथ दिने प्रतिबद्धता व्यक्त गर्नुभयो ।
गौडेलले अहिले काँग्रेस जिताउने अभियानमा सबै एकजुट हुन आग्रह गर्दै विकास, स्थायित्व र समावेशितालाई आफ्नो प्राथमिकता बनाउने बताउनुभयो । नेपाल थारु संघ बाँकेका अध्यक्ष बजारु थारुको अध्यक्षतामा भएको कार्यक्रममा सहभागी अधिकांश थारु अगुवाहरुले गौडेललाई सादगी र जनप्रिय नेता भएको भन्दै जिताउने प्रतिबद्धता जनाए । नेतृत्वमा इमान्दार, सरल र समुदायसँग नजिक रहने व्यक्तित्व गौडेलबाहेक अरु नभएको उनीहरुको भनाइ थियो ।
कार्यक्रममा समानुपातिक उम्मेदवार दीप नारायण वर्मा, महासमिति सदस्य पूर्णप्रसाद आचार्य, काँग्रेसका जिल्ला सहसचिव बिनोद थारु, नेपाल थारु संघका केन्द्रीय सदस्य जागेश्वर चौधरीलगायतले पनि मन्तव्य राख्नुभएको थियो । सहभागिहरुले दशकौँदेखि उठ्दै आएका सुकुम्बासी, मुक्तकमैया, शिक्षा, रोजगारी, प्रतिनिधित्व र नीति निर्माणमा पहुँच, स्थानीय विकास निर्माण लगयातका सवालमा सहभागीहरुले खुलेर आफ्ना धारणा राख्नुभएको थियो ।
