नेपालगन्ज । फागुन २१ गते हुने प्रतिनिधिसभा सदस्य निर्वाचन नजिकिँदै गर्दा उम्मेदवारहरु मतदाताको घरदैलोमा पुगिरहेका छन् । नेताहरु पनि पार्टीका उम्मेदवार जिताउन अग्रसर भएका छन् ।
बाँके क्षेत्र नं. १ मा नेपाली काँग्रेसका तर्फबाट उम्मेदवार बनेका नारायण प्रसाद गौडेलको पक्षमा माहोल बनाउन पूर्व क्षेत्रिय सभापति माधवराम खत्री पनि घरदैलोमा निस्किनुभएकाे छ । सोमवार बिहानको मधुरो घामसँगै गौडेलसंगै खत्री कोहलपुर नगरपालिका वडा नं. १० मा पुग्नुहुन्छ । स्थानीयका ढोकाढोका पुग्दै उहाँ मतदातासँग हातेमालो गर्दै आफ्ना प्रतिबद्धता सुनाउनु हुन्छ ।
वडा कार्यसमितिको आयोजनामा भएको घरदैलो कार्यक्रममा स्थानीय नेता, कार्यकर्ता र समर्थकहरुको उल्लेखनीय उपस्थिति देखिएको थियो । घरदैलोको क्रममा देखिएको उत्साहले चुनावी माहोललाई गौडेलमय बनाउँदै लगेको देखिन्थ्यो ।
स्थानीय बासिन्दा घरबाहिर निस्केर उम्मेदवारलाई स्वागत गर्छन्, आफ्ना समस्या राख्छन् र भविष्यका अपेक्षाहरु सुनारहेका थिए । पूर्व क्षेत्रिय सभापति खत्रीले गौडेलको घरदैलो अभियान उत्साहपूर्ण तरिकाले अघि बढिरहेको बताउनुभयाे ।
लामो समयदेखि बाँके क्षेत्र नं. १ का जनताको सुखदुःखमा खटिँदै आउनुभएका गौडेललाई यसपटक आफ्नै निर्वाचन क्षेत्रबाट उम्मेदवारका रुपमा पाउँदा मतदातामा थप उत्साह जागेको खत्रीले बताउनुभयाे ।
खत्री भन्नुहुन्छ, “गौडेल जी यहाँका जनताको दुःखसुखसँग नजिकबाट जोडिनु भएको नेता हो । अहिले उहाँ उम्मेदवार बनेपछि स्थानीयले आफ्नो मान्छे चुनावमा उठेको अनुभूति गरेका छन् ।” घरदैलोमा भेटिएका धेरै मतदाताले रोजगारी, शिक्षा, स्वास्थ्य र पूर्वाधार विकासका विषयलाई प्राथमिकतामा राख्नुपर्ने बताएका छन् ।
उनीहरु भन्छन् अबको नेतृत्वले प्रतिवद्धता मात्रै होइन, परिणाम पनि देखाउनुपर्छ । गौडेलले पनि आफ्ना सम्बोधनमा जनताको अपेक्षा बुझ्दै त्यसअनुसार काम गर्ने प्रतिबद्धता व्यक्त गर्दै आएका छन् । उहाँले विकास र समृद्धिलाई केन्द्रमा राख्दै आफ्नो अभियान अघि बढाइरहेको बताउनुभयाे ।
अहिलेको काँग्रेस “बदलिएको काँग्रेस, देश बदल्ने अठोट” का साथ जनतामाझ आएकाले पनि मतदाताहरु उत्साहित भएको कोहलपुर नगरपालिका-१० का सभापति मेघनाथ भट्टराईले बताउनुभयाे । यही सन्देशले पनि मतदातामा नयाँ उत्साह र विश्वास जगाएको उनको भनाइ छ । उहाँले थप्नुभयाे, “जनताले अब परिवर्तन चाहेका छन् । काँग्रेसले त्यो परिवर्तनको जिम्मा लिने प्रतिबद्धता बोकेको छ ।”
