नेपालगञ्ज । खानेपानी तथा सरसफाई स्वच्छता सम्बन्धी नेपालगञ्जका बिद्यालयहरुका लागि डिजिटल बास तालिम संचालन हुने भएको छ ।
नेपालगञ्जमा बसेको शैक्षिक क्षेत्रका व्यक्तिहरुसंगको छलफलबाट बिद्यालयहरुको क्षमता बृद्धिका लागि डिजिटल वास तालिम संचालन गर्ने निर्णय गरिएको छ । स्वच्छता प्रवद्र्धन गर्ने उद्देश्यले नेपालगञ्ज उपमहानगरपालिकाको समन्वयमा नेपालगञ्जमा स्वास्थ्य र बिकासका लागि नगर सरसफाई तथा स्वच्छता परियोजना संचालनमा रहेको छ ।
एस एन भि नेपालको आर्थिक सहयोगमा गेरुवा ग्रामीण जागरण संघ बर्दिया, नेपालगञ्जद्धारा संचालित परियोजनाको सहयोगमा उक्त तालिम संचालन गर्ने सरोकारवालाहरुले निर्णय गरेको परियोजना संयोजक गफ्फार अलि बेहना शेषले जानकारी दिनुभयो ।
बिद्यालय व्यवस्थापन समिति, शिक्षक अभिभावक संघ, प्रधानाध्यापक र शिक्षकहरुबीच गरिएको छलफलमा बिद्यालयमा कसरी स्वच्छता र सरसफाईलाई कार्यान्वयन गर्न सकिने बिषयमा छलफल गरिएको थियो ।
नेपालगञ्ज उपमहानगरपालिका शिक्षा शाखा प्रमुख गोरख बहादुर थापाको अध्यक्षतामा बसेको बैठकले बिद्यालयलाई सरसफाईमा अगाडी बढाउने सहमति भएको छ ।
छलफलमा एस एन भि नेपालका सिटि अफिसर सुरज राजभण्डारीले बिद्यालय सरसफाईका लागि आवश्यक न्यूनतम मापदण्ड तथा आवश्यकताबारेमा जानकारी गराउनुभएको थियो ।
