नेपालगञ्ज । राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले राप्रपा बाहेकका सबै नेताहरु भ्रष्ट भई सकेको बताउनुभएको छ ।
लिङ्देनले जनताको विश्वासलाई ठूला दलहरुका नेताहरुले हरेक पटक घात गरेको बताउनुभयो ।
शनिबार नेपालगन्जमा आयोजित कार्यक्रममा सम्बोधन गर्दै लिङ्देनले ठूला दलका नेताहरुले आफूलाई भगवान ठान्ने गरेको बताउनुभयो ।
‘आजकाल एमाले, कांग्रेस, माओवादी जस्ता ठूला दलका नेताह आफूलाई भगवान मान्ने गर्छन् । उनीहरु जनताले आफूलाई जयजयकार गरेकै छन्, अध्यक्ष लिङ्देनले भन्नुभयो, जुलुसमा सहभागी भई हाल्छन् । हामीले जे भने त्येही मान्छन् । भन्ने मानसिकतामा हुनुहुन्छ । तर अब त्यो जनताले कदापी स्वीकार गर्दैनन् ।’
लिङ्देनले सभालाई सम्बोधनका क्रममा कतिपटक पुरानै नेतालाई जिताउँदा देशको विकास हुन्छ भन्दै सभामा उपस्थित नगरवासीलाई प्रश्न गर्नुभएको थियो । उहाँले जतिपटक पुराना नेताले जिते पनि देशका लागि केही गर्न नसक्ने बताउनुभयो ।
उहाँले देशका भ्रष्ट नेता र देशबाट भ्रष्टाचारलाई जरैबाट निर्मुल पार्न राप्रपाले अभियान थालनी गरेको बताउनुभयो । उहाँले राप्रपामा पनि कसैले भ्रष्टाचार गरेको थाहा पाए आफैंले कारबाही गर्ने चेतावनी समेत दिनुभयो ।
लिङ्देनले भन्नुभयो, ‘यदि कसैले मैले १ रुपैयाँ पनि भ्रष्टाचार गरेको थाहा पाउनु भयो भने । जनताले दिएको जे सजाए पनि भोग्न तयार छु, र मेरो पार्टीमा म एक रुपैयाँ पनि भ्रष्टाचार गर्न दिन्न । यदि कसैलाई लाग्छ कि यो पाटीमा केही खान पाइन्छ भने, सो व्यक्तिले यो पार्टी छोडेर जान सक्छ ।’
