बाँके । कोरोना संक्रमण देखिएपछि मृत्यु भएका नेपालगञ्ज उपमहानरपालिकाका कर्मचारी युवराज बिक्रम घलेको सोमबार अन्त्येष्टी गरिएको छ । ५९ वर्षीय घलेको सोमबार बिहान बाँकेको राप्ती नदी सिधनियाँ घाटमा हिन्दु संस्कार अनुसार अन्त्येष्टी गरिएको हो ।
नेपाली सेनाको सलामीसहित घलेको अन्त्येष्टी गरिएको बाँकेका कोरोना फोकल पर्सन नरेश श्रेष्ठले जानकारी दिनुभयो । नेपालगन्ज वडा नं–९ का घलेको आइतबार साझ ८स् ३० बजे मृत्यु भएको थियो ।
भदौ १८ गते पौने ३ बजे नेपालगञ्ज मेडिकल कलेज कोहलपुरमा भर्ना भएका घलेमा मुटुको रक्त नलिमा समस्या रहेको थियो । उहाँको स्वास्थ्यमा सुधार नआएपछि समस्या बढ्दै गएर मृत्यु भएको अस्पतालले जनाएको छ ।
मृतकको भदौ १५ गते कोरोना परीक्षण रिर्पोट पोजेटिभ आएको थियो । घले नेपालगञ्ज उपमहानगरपालिकाको जिन्सी शाखा सहायक हुनुहुन्थ्यो । उहाँको मृत्यु शोकमा उपमहानगरपालिका कार्यालय एक दिनका लागि बन्द गरिएको छ भने मंगलबारदेखि तीन दिनसम्मका लागि कार्यालय शिल गरिएको छ ।
