ठाकुरद्धारा । नेपाल प्रेस युनियनको नवौं महाधिवेशन आगामी जेष्ठमा हुने भएको छ । बर्दियाको ठाकुरद्वारामा बुधबार बसेको केन्द्रीय कार्यसमिति बैठकले आगामी जेठ १३ र १४ गते गर्ने निर्णय गरेको हो ।
युनियनका अध्यक्ष बद्री सिग्देलले प्रेस युनियनको नवौं महाधिवेशन आगामी जेठ १३ र १४ गतेका लागि निर्धारण गरिएको जानकारी दिनुभयो । उहाँकाअनुसार महाधिवेशन स्थलको टुंगो सचिवालयले लगाउने छ ।
यसअघि युनियनले गत चैत २१ र २२ गते बाँकेको नेपालगञ्जमा महाधिवेशन गर्ने निर्णय गरेर महाधिवेशनको तयारी समेत थालनी गरिसकेको थियो । तर, विश्वव्यापी रुपमा फैलिएको कोरोना महामारीका कारण महाधिवेशन स्थगित गरिएको थियो ।
युनियनका प्रतिष्ठान, जिल्ला र विदेश गरि ८७ शाखा छन् । शाखाबाट आएका झण्डै एक हजार पाँच सयभन्दा बढी प्रतिनिधि महाधिवेशनमा सहभागी हुने केन्द्रीय अध्यक्ष सिग्देलले बताउनुभयो ।
