ऐजेन्सी । अमेरिकामा कोरोना भाइरस महामारीको चौथो चरण थप जोखिमपूर्ण हुने उच्च स्वास्थ्य अधिकारीले चेतावनी दिएका छन् ।
सेन्टर फर डिजिज कन्ट्रोल एण्ड प्रिभेन्सन (सिडिसी) की प्रमुख डा.रशेल वालेन्स्कीले अति तीव्र गतिमा संक्रमण फैलिने कोरोना भाइरसको नयाँ भेरियन्ट जोखिमपूर्ण हुने देखिएको बताउनुभयो ।
पछिल्लो तथ्यांकले महामारीको सम्भावित चौथो चरणमा नयाँ भेरियन्ट थप चुनौतिपूर्ण बनेर आउने देखिएको उहाँले बताउनुभयो । गएको हप्ता दैनिक औषतमा ७० हाजर मानिसमा संक्रमण देखिएको र त्यो अति उच्च रहेको डा.वालेन्स्कीको भनाई छ। गत हप्ता औषतमा दैनिक दुई हजार अमेरिकीको कोरोनाका कारण ज्यान गएको थियो ।
सिडिसीकी निर्देशक डा.वालेन्स्कीले सोमबार भन्नुभएको छ, ‘संक्रमण यस्तो भइरहेको र तीव्र गतिमा फैलिने नयाँ भेरियन्ट फैलिरहेको अवस्थामा हामीले महामारी नियन्त्रणका लागि बनाएको आधार पनि डगमगाउने खतरा छ । यी भेरियन्टहरु सर्वसाधारण र हाम्रो प्रयासका लागि वास्तविक चुनौति हुन् ।’
अहिले कोरोना भाइरसका विभिन्न भेरियन्टहरु सक्रिय रहेका छन् । तर स्वास्थ्य विज्ञ भने केही भेरियन्टलाई लिएर मात्रै चासो व्यक्त गरिरहेका छन् । बेलायत, दक्षिण अफ्रिका र ब्राजिलमा देखिएका कोरोना भाइरसका नयाँ भेरियन्टहरु बढि संक्रामक र जोखिमपूर्ण देखिएका छन् ।
बेलायतमा पहिलोपटक देखिएको कोरोना भाइरसको अति संक्रामक भेरियन्ट बी १.१.७ ले यो महिना (अप्रिल) अमेरिकामा दबदबा कायम गर्ने पूर्वानुमान सिडिसीले गरेको छ । कोरोना महामारीका कारण विश्वमै सबैभन्दा बढि प्रभावित भएको अमेरिकामा अहिलेसम्म पाँच लाख १४ हजार तीन सय भन्दा धेरैको ज्यान गएको छ । अमेरिकीमा कुल संत्रमितको संख्या दुई करोड ८६ लाख ५९ हजार सात सय भन्दा धेरै पुगेको छ ।