बनकटी । बाँकेको डुडुवा गाउँपालिका वडा नं.३ स्थित माध्यमिक बिद्यालय बनकटीले दिवा खाजा कार्यक्रम शुरु गरेको छ । गाउँपालिकाभित्र रहेका बिद्यालयहरुमध्ये पहिलो बिद्यालयका रुपमा बनकटीले बुधबारबाट दिवा खाजा कार्यक्रम शुरु गरेको हो ।
खाजा कार्यक्रमको उद्घाटन शत्रमा डुडुवा गाउँपालिका वडा नं ३ का वडा अध्यक्ष भण्डारीलाल यादव, शिक्षा समन्वय इकाईका प्रमुख रामशुरेस यादव र गाउँपालिका शिक्षा शाखा प्रमुख संजय कुमार कर्णको सहभागिता रहेको थियो ।
गाउँपालिकाका अन्य बिद्यालयले अझै दिवा खाजा कार्यक्रम शुरु गर्न सकेका छैन । शिशु देखि ५ कक्षासम्मका बिद्यार्थीहरुलाई लक्षित दिवा खाज कार्यक्रम शुरु गरिएको गाउँपालिका शिक्षा शाखा प्रमुख कर्णले जानकारी दिनुभयो ।
अहिलेलाई माबि बनकटीमा यो कार्यक्रम शुरु भएको छ, कर्णले भन्नुभयो, केही दिनपछि गाउँपालिकाभित्रका अन्य बिद्यालयमा समेत यो कार्यक्रम शुरु गछौं । नेपाल सरकारको ससर्त अनुदानमा आएको कार्यक्रम भएको र यसमा बाल विकास देखि ५ कक्षासम्मका बालबालिकाले दिवा खाजा प्राप्त गर्ने भएको जानकारी दिनुभयो ।
प्रत्येक बिद्यार्थीलाई रु १५ रुपैया बराबरको पौष्टिक आहार खुवाउन सकिने तर चाउचाउ, मःम जस्ता कुरा खुवाउन नपाईने प्रमुख कर्णले बताउनुभयो । तोकिएको सिमाभित्रको खाजा खुवाएको नपाइए त्यस्ता बिद्यालयका प्रअलाई कानून बमोजिम कारवाही गरिने उहाँले बताउनुभयो ।
एक महिनाभित्र प्रत्येक बिद्यालयमा खाजा शुरु गर्ने उहाँले बताउनुभयो । बालबालिकालाई भोकले बिद्यालय छाड्ने, पढन नआउने, काम गर्न जाने र बालबालिकाहरुको शारीरीक र मानसिक बृद्धि हुने हेतुले यो कार्यक्रम संचालनको मुख्य उद्देश्य रहेको छ ।
बनकटी माबिमा शिशु कक्षादेखि ५ कक्षासम्म ६ सय ५४ जना बिद्यालर्थीहरु रहेका छन् । रकम निकासा नभएपनि शिक्षक कर्मचारीको सहयोगमा दैनिक तालिका बनाएर कार्यक्रम शुरु गरिएको बिद्यालयका प्रधानाध्यापक पुरुषोत्तम खनालले जानकारी दिनुभयो । दैनिक तालिकामा हलुवा, चना भुजा, चना चिउरा जस्ता पौष्टिक खानेकुरा खुवाउने राखिएको छ ।
खाजा कार्यक्रमले बिद्यालयमा बिद्यार्थीको उपस्थिति बढ्ने प्रधानाध्यपाक खनालको भनाई छ । खाजा कार्यक्रमको उद्घाटन कार्यक्रममा बिद्यालय व्यवस्थापन समितिका अध्यक्ष दिनेश बर्मा लगायत पदाधिकारीहरुको उपस्थिति रहेको थियो ।
