नेपालगञ्ज । बाँकेमा कोरोना जित्नेको संख्या बढ्दै गएको छ । एकातिर कोरोना संक्रमित बढेर भयावह स्थिति सृजना भएको छ भने अर्कोतिर कोरोना परास्त गर्नेहरु पनि बढ्दै गएका हुन ।
यसले कोरोनालाई जित्ने मनोबल बढाउँछ । बैशाख १ देखि १९ गते सम्म १ हजार ६ सय २४ जनाले कोरोना जितेको जिल्ला कोभिड–१९ संकट व्यवस्थापन केन्द्र बाँकेको तथ्याँक छ ।
जित्नेहरुमध्ये ७ सय २३ महिला र ९ सय १ पुरुष रहेको जिल्ला कोभिड–१९ संकट व्यवस्थापन केन्द्रका कोरोना फोकल पर्सन तेज ओलीले जानकारी दिनुभयो ।
उहाँका अनुसार बैशाखको शुरुवातमा संक्रमितको संख्या बढ्दै गएको भएपनि १६ गते यता कोरोना निको हुनेको संख्या पनि बढेको छ । केन्द्रको तथ्याँक अनुसार बैशाख १६ मा २ सय ४४, १७ गते २ सय ५, १८ गते २ सय ५० र १९ गते सबैभन्दा बढी ३ सय ५ जनाले कोरोना परास्त गरेका छन ।
