दाङ । माओवादी केन्द्रले आफूहरूको सम्पर्कबाहिर रहेकी भनेको लुम्बिनी प्रदेश सांसद विमलाकुमारी खत्री वली नेपालगन्जमा रहेको प्रहरीले बताएको छ ।
उहाँ फोन सम्पर्कमा आएको र उपचारका क्रममा नेपालगन्जमा रहेको जानकारी दिएको दाङका प्रहरी प्रमुख एसपी सुरेशप्रसाद काफ्लेले बताउनुभयो ।
दाङका प्रमुख जिल्ला अधिकारी रामबहादुर कुरूम्बाङले पनि सांसद वली सम्पर्कमै रहेको बताउनुभयो । फोनमा कुरा भैरहेको र कुनै समस्या नरहेको उनको भनाइ छ ।
एमालेबाट निर्वाचित पति उत्तरकुमार वलीको मृत्यु भएपछि उहाँ उपनिर्वाचन मार्फत सांसद हुनुभएको हो । तत्कालीन नेकपाबाट जितेकी उहाँले पार्टी विभाजनपछि भने माओवादी केन्द्र रोज्नुभएको थियो ।
यद्यपि एमालेले सूर्य चिन्हबाट लडेको सांसद भन्दै उहाँलाई सत्तापक्षमा कुर्सी राख्न प्रदेश सभालाई पत्राचार गरेको थियो । माओवादी केन्द्रले एमालेले उहाँलाई आफ्नो कब्जामा लिएको आरोप लगाएको छ ।
