नेपालगञ्ज । नेपालगञ्जका मुस्लिम युवाहरुले भेरी अस्पतालमा रहेका सुत्केरी महिलाहरुलाई सहयोग सामाग्री वितरण गरेका छन् ।
मोहरर्मको अवसरमा सुत्केरी महिलाहरुलाई फलफूल, पानी, बिस्कुट र मेवाहरु वितरण गरि इमामे हुसैन रजिअल्लाह हु तआला अन्हुको युवाहरुले याद मनाएका हुन ।
हजरत इमामे हुसैन रजिअल्लाह हु तआला अन्हु दीने ईस्लामको अन्तिम पैगम्बर हजरत मोहम्मद सल्लल्लाह हु तआला अलैही वसल्लमको नाती हुन् । हिजरी ६१ मा पैगम्बरे ईस्लामको नातिलाई इराकको कर्बला भन्ने क्षेत्रमा सहिद गरिएको थियो ।
मानवता र दुष्टता बीच भएको त्यो युद्धमा हजरत इमामे हुसैन रजिअल्लाह हु तआला अन्हु सहित ७२ जना घरपरिवारलाई सहिद गरिएको थियो ।
मोहरर्म कुनै पर्व नभएर एउटा यादगार हो, अपराध, सामाजिक विकृति र दुष्टतालाई अन्त्य गर्न सहिद हुनुभएको हजरत इमाम हुशैनले दिएको संदेश बमोजिम समाजसेवा गरेर याद मनाउनु पर्छ भन्ने मुस्लिम युवा आसिफ अन्सारीले बताउनुभयो ।
ईमाम हुसैनले दिएको संदेश शान्ति, भेदभावरहित समाज र भाइचारा रहेकोले भेरी अस्पतालमा रहेका सय जना सुत्केरी महिलाहरुलाई फलफूल लगायतको सामग्री वितरण गरिएको हो ।
हिजरी ६१ मा हजरत ईमाम हुशैन रजिअल्लाह हु तआला अन्हुलाई यजीद भन्ने शासकले २२ हजार फौजको दस्ता लिएर सहिद गरेको अन्सारीले बताउनुभयो ।
यजीदले दीने ईस्लामको संदेश विपरीत शासन चलाउने चेष्टा गरेपछि ईमाम हुसैन र यजीद बीच युद्ध भएको हो । ईमाम हुसैन हजरत पैगम्बर मोहम्मद सल्लल्लाह हु अलैही वसल्लमको नाती भएकोले दुष्ट र मानवताहीन ब्यक्तिलाई मानव जातीको रक्षक स्वीकार नगर्ने अठोट लिएपछि कर्बलाको युद्ध भएको थियो ।
यजीदको बारेमा वल्माहरुले विभिन्न किताबको प्रमाण अनुरुप बताउँछन् कि यजीदले जाँडरक्सी, बलात्कार, नमाज नपढ्ने, जुवातास लगायतको अपराधलाई बढावा दिने र आफू पनि संलग्न हुने गरेकोले ईमाम हुसैनले उसको शासनलाई अस्वीकार गर्नुभएको थियो ।
सोही अपराधलाई अन्त्य गर्न ईमाम हुशैन ७२ जना सहित सहिद भएर दीने ईस्लामको संदेशलाई जोगाएका हुन् । यादगारे हुसैनको अवसरलाई आधार बनाइ नेपालगञ्जका मुस्लिम युवाहरुले गरेको सहयोगलाई प्रोत्साहित गर्नुपर्ने भन्दै भेरी अस्पताल व्यवस्थापन समिति सदस्य कृष्ण प्रसाद श्रेष्ठले युवाहरूको प्रसंशा गर्नु भयो ।
युवाहरु समाजको जग हुन् र युवाहरुले सामाजिक कार्य गरेको देखेर प्रसन्नता अनुभुती हुन्छ । उहाँले भन्नूभयो, आगामी दिनमा समेत सामाजिक कार्य गरेको हेर्न पाउँ ।
त्यस्तै सुत्केरी महिलाहरुलाई सहयोग गर्न अगाडि कदम बढाएको मुस्लिम युवाहरूलाई प्रोत्साहित गर्दै हाथ बटाउन समाजसेवी रचना श्रेष्ठले समेत सहयोग गर्नु भएको थियो ।
उहाँले युवाहरुले गरेको सामाजिक कार्यमा सहभागी हुनु भनेको युवाहरूलाई बाटो देखाउनु सरह रहेको बताउनु भयो । सहयोग सामाग्री वितरण कार्यक्रममा युवा पिढीबाट अंकित श्रीवास्तव र मुस्लिम युवा समीर अली बेहना, अजहर सिद्दीकी, साहिल अन्सारी, इब्रार खान लगायतको उपस्तिथि रहेको थियो ।
