नेपालगन्ज । बाँकेकाे गनापुरमा रहेकाे अम्बे स्टिल उद्योगले खनेको खाल्डोमा डुबेर एक बालकको मृत्यु भएको छ ।
जानकी गाउँपालिका वडा नम्बर ५ छब्बनपुर्वाका ७ वर्षीय बालक सञ्जु करबलको शनिबार बिहान मृत्यु भएको जिल्ला प्रहरी कार्यालय बाँकेका प्रवक्ता डिएसपी रामप्रसाद घर्तीमगरले जानकारी दिनुभयाे ।
घटना बारे अनुसन्धान भइरहेको छ । जानकी गाउँपालिका वडा नम्बर ५ मा अम्बे स्टिलले उद्योग सञ्चालन गर्दै आएको छ ।
उद्योगले पर्खाल निर्माणका लागि खनेको करिव १० फिट गहिरो खाल्डोमा जमेको पानीमा डुबेर ति बालकको मृत्यु भएको जानकी गाउँपालिका वडा नम्बर ५ का वडाअध्यक्ष टिकानाथ यादवले बताउनुभयाे ।
वडाअध्यक्ष यादवका अनुसार बिहान करिव ५ बजेतिर बालक शौच गर्न निस्केका थिए । घटनाबारे उद्योगले अहिलेसम्म कुनै चासो नदेखाएको वडाअध्यक्ष यादवले बताउनुभयो ।
मृतक बालकका बुवा मुन्सीलाल करबलले अम्बे स्टिलको लापरबाहीका कारण छोराको मृत्यु भएको बताउनुभयाे ।
