दाङ । दाङको घोराही नगरपालिकामा जापान सरकारले आज एक प्रसुति भवन हस्तान्तरण गरेको छ । एच ई कार्यक्रम अन्तर्गत नेपालका लागि जापानका राजदूत किकुता युताकाले सो प्रसव केन्द्र हस्तान्तरण गर्नुभएको हो ।
जापान सरकारको ग्रासरुट ह्युमन सेक्युरिटी प्रोजेक्ट (जीजीपी) को अनुदान सहयोग अन्तर्गत नेपाल परिवार नियोजन संघ ( एफ पान )द्वारा सञ्चालित बाल जन्म केन्द्र निर्माण र चिकित्सा उपकरण जडान गर्ने परियोजनालाई अमेरिकी डलर ९१,९२० (करिब एक करोड रुपैयाँ) सहयोग गरिएको थियो ।
सो अवसरमा राजदूत किकुताले परियोजनामा संलग्न सबैको प्रयासलाई बधाई तथा प्रशंसा गर्नुभयो । उहाँले बालबालिका नै देशको भविष्यको आशा रहेको बताउँदै उनीहरूका आमाहरूको हेरचाह गर्नु समग्र समाजको लागि आवश्यक जिम्मेवारी भएको बताउनुभयो ।
नवनिर्मित, भूकम्प प्रतिरोधी र सुविधासम्पन्न केन्द्रले सुरक्षित प्रसूति र उचित प्रसव पूर्व र पोस्ट नेटल हेरचाह र सेवाहरू प्रदान गरेर परिवार र समुदायलाई धेरै फाइदा पुर्याउनेछ ।
उहाँले यस परियोजनाको नतिजाले नेपालमा बाल तथा मातृ स्वास्थ्य सेवाको विकास र दुई देशबीचको आदान प्रदानलाई थप सहयोग पुग्ने विश्वास व्यक्त गर्नुभयो । सन् १९५९ मा स्थापित, एफपानले आफ्नो मुख्यालय र ३१ शाखाहरूमार्फत देशभर स्त्री रोग सेवाहरू, परामर्श, एच आइ भि परीक्षण र उपचारसहित परिवार नियोजनका सेवाहरू प्रदान गर्दछ ।
प्रसुति भवनका लागि भएको यो सहयोगले केन्द्रमा उपस्थित आमा र बच्चा दुवैलाई मद्दत गर्ने र जापान र नेपालका जनताबीचको मित्रतालाई अझ प्रगाढ बनाउने दूतावासको विश्वास छ ।
सामुदायिक सामाजिक आर्थिक विकासका लागि तल्लो तहका मानिसहरूलाई प्रत्यक्ष रूपमा लाभान्वित हुने परियोजनाहरू कार्यान्वयन गर्न जीजीपी स्थापना गरिएको हो । सन् १९९१ देखि नेपालमा २०० भन्दा बढी जीजीपी परियोजनाहरू कार्यान्वयन भइसकेका छन् ।
