नेपालगञ्ज । शुक्रबार जाजरकोट र रुकुमपश्चिम केन्द्र बिन्दु भएर गएको भुकम्पमा परि घाइते भएकाहरुले ३२ जनाको बाँकेका अस्पतालमा उपचार भइरहेको छ ।
जिल्ला आपतकालिन कार्य संचालन केन्द्र बाँकेका अनुसार घाइते भएकाहरुमध्ये शनिबार राती ९ बजेसम्म बाँकेमा उपचारका लागि ३२ जना प्रभावित बिरामी ल्याइएको छ ।
उपचाररत बिरामीमध्ये २ जना सिकिस्त छन् भने ३० जना खतरा मुक्त रहेका छन् । केन्द्रका अनुसार १ जनाको अस्पताल पुर्याउनु अघि नै मृत्यु भएको थियो । उहाँको शव आइतबार जाजरकोट पठाउने ब्यवस्था केन्द्रले मिलाएको छ ।
बाँकेमा उपचाररत बिरामीहरुको निःशुल्क उपचारका साथै बिरामी र कुरुवाका लागि लगाउने कपडा, बेड बिस्तरा, पिउने मिनिरल पानी, फलफूल लगायत अत्यावश्यक कुराहरुको समेत व्यवस्था मिलाइएको केन्द्र बाँकेका फोकल पर्सन नरेश श्रेष्ठले जानकारी दिनुभयो ।
बाँकेका प्रमुख जिल्ला अधिकारीलगायतको सक्रियतामा नेपालगञ्जस्थित भेरी अस्पताल तथा मेडिकल कलेजमा ३२ जना उपचाररत घाइतेहरुको उपचारको सफल ब्यवस्थापन भएको केन्द्रले जनाएको छ ।
