नेपालगञ्ज । बाँकेमा पहिलोपटक विरहा प्रतियोगिता कार्यक्रम गरिएको छ । कला र संस्कृतिको संरक्षणका लागि जिल्लामा पहिलो पटक जानकी गाउँपालिकास्तरीय विरहा प्रतियोगिता कार्यक्रम गरिएको हो । जानकी गाउँपालिकाको आर्थिक सहयोगमा यादव समाज सेवा केन्द्र केन्द्रीय कार्यालयको आयोजना गरिएको विरहा प्रतियोगितामा वडा न-५ प्रथम, वडा न-२ द्वितीय र वडा न-३ तृतीय भएको छ ।
प्रथम वडा न-५ को समूहमा जगेश्वर यादव, जगमोहन यादव र नन्कउ यादव रहनुभएको थियो । द्वितीय वडा न-२ को समूहमा मालती यादव, सावितराम यादव, राधे यादव रहनुभएको थियो भने तृतीय वडा न-३ को समूहमा सन्तोष यादव, सुकईलाल यादव र सक्टु यादव रहनुभएको थियो । बिजयीहरूलाई जानकी गाउँपालिकाका प्रवक्ता एवम् वडा न-५ का वडा अध्यक्ष टिकानाथ यादव, कार्यपालिका सदस्य एवम् वडा न-४ का वडा सदस्य कमलादेवी यादव, वडा न-३ का वडा सदस्य हुसैनी यादव र केन्द्रका केन्द्रीय संस्थापक कोषाध्यक्ष एवं हालका सल्लाहकार मिश्रीलाल यादव र केन्द्रका केन्द्रीय अध्यक्ष सूर्यलाल यादवले पुरस्कार वितरण गर्नुभएको थियो ।
पुरस्कार वितरण कार्यक्रमलाई सम्बोधन गर्दै प्रवक्ता एवम् वडा अध्यक्ष टिकानाथले जिल्लामा पहिलो पटक यस प्रकारको प्रतियोगिताले यादव समुदायमा प्रख्यात यो विशेष गितको संरक्षणमा ठुलो योगदान पुर्याउने बताउनुभयो । यादव समुदायका व्यक्तिहरूले खासमा खुसी, टाढापन, एक्लो भएको बेला, वनजंगल गएको बेला, गोठाला जाने समय लगायत विभिन्न समयमा यो गीत गाउने प्रचलन रहेको उहाँले स्पष्ट पार्नुभयो ।
समुदायको कला, संस्कृत संरक्षणका लाागि यो कार्यक्रम फलदायी हुन्छ, अध्यक्ष यादवले भन्नुभयो, यस्ता कार्यक्रम प्रतियोगिताले इतिहासलाई जोगाउने कार्य गर्छ । कार्यपालिका सदस्य कमलादेवीले गाउँ गाउँमा विद्यमान विरहा गीतलाई आउने पुस्तालाई सिकाउन आवश्यक रहेको धारणा राख्नुभयो । विरहाका बारेमा पुराना व्यक्तिहरूलाई मात्रै जानकारी भएकाले समुदायका हरेक सन्ततिले जान्नुपर्नेमा जोड दिनुभयो ।
वडा सदस्य हुसैनीले पहिलो पटक आयोजना गरिएको कार्यक्रमको प्रशंसा गर्दै पालिकाले यो नौलो विषयमा सक्रियता देखाएकोमा धन्यवाद दिनुभयो । विरहा यादव समुदायसँग जोडिएकाले यसको जगेर्ना जरूरी रहेको बताउनुभयो । केन्द्रका केन्द्रीय अध्यक्ष सूर्यलालले समुदायमा रहेको यो चलनलाई दिगो बनाउन सहयोेगी भूमिका निर्वाह होस भनेर यो कार्यक्रम गरिएको बताउनुभयो । विभिन्न बाधा, चुनौतीका बीच कार्यक्रम सम्पन्न गर्न सफल भएकोमा सम्पूर्ण समुदायलाई आभार व्यक्त गर्नुभयो ।
१९ वर्षपछि सक्रिय भएको केन्द्रले सामाजिक कार्यमा अग्रसरता बढाएको छ । शुरूमा एउटा संस्था संचालन गर्ने भनेर केन्द्रको स्थापना गरिएको थियो । पछिल्लो समय केन्द्रले समुदायका विपन्न तथा जेहेन्दार किशोरीहरुलाई छात्रवृत्ति तथा विवाहमा सहयोग गर्ने लगायतको कार्य गर्दै आएको छ । विरहा एक खालको गीत हो । यो गीत धेरैजसो यादव समुदायमा गाउने गरिन्छ । खासगरी गोठाला गएका समय, बिदेश रहेका समय, जंगल वा वनपात गएका बेला, समुदायका व्यक्ति जम्मा भएको समयमा गाउने गरिन्छ । यो व्यक्ति बिशेषको परिचय, बखान, सम्मान, पीडा, दुःख, धर्म संस्कृति, हासो मजाक जस्ता कुरा वा बिषयबस्तुलाई समेटेर गाईने एक गीत हो ।
बिजयी प्रतियोगीहरूमध्ये प्रथम हुने प्रत्येकलाई साईकल, द्वितीय र तृतीयलाई दुधको बम्बी प्रदान गरिएको थियो । दुई चरणमा भएको प्रतियोगितालाई जानकी गाउँपालिका अध्यक्ष छब्बन खाँ, उपाध्यक्ष रामप्यारी यादवले उद्घाटन गर्नुभएको थियो । कार्यक्रमलाई लुम्बिनी प्रदेशका कृषि मन्त्री भण्डारीलाल यादवसमेतले सम्बोधन गर्नुभएको थियो ।
