नरैनापुर । बाँकेको नरैनापुर गाउँपालिका वडा नं ६ का बिभिन्न गाउँ टोलहरुमा बाल विवाह न्युनिकरण सम्बन्धी सडक नाटक प्रदर्शन गरिएको छ ।
गाउँपालिका वडा नं ६ को कार्यालयको सहयोगमा सभ्य समाज नेपाल नेपालगञ्जले वडाको बिभिन्न गाउँहरुमा बाल विवाह सम्बन्धी सटक नाटक प्रदर्शन गरेको हो ।
वडाको सबैभन्दा बढि बाल विवाहको जोखिम रहेको क्षेत्र अनुमान गर्दै सडक नाटक मार्फत सचेतना फैलाइएको संस्थाका अध्यक्ष सूर्यलाल यादवले जानकारी दिनुभयो ।
सानै उमेरमा विवाह गर्दा आइपर्ने समस्या, चुनौती, सम्भावित दुर्घटनालाई प्रस्तुत गरिनुका साथै नेपाल सरकारले बाल विवाह बिरुद्धको निर्माण गरेको कानून र त्यसमा रहेका व्यवस्थाले गर्ने सजाय पनि समेटिएको थियो ।
वडा नं ६ को जमुनी, सोनवर्षा, गंगापुर र नयाँबस्ती (भोजपुर) गाउँमा प्रदर्शन गरिएको सडक नाटकमा कलाकारहरु हारुन अलि, प्रकाश नेपाली, उदयराज जैसवाल, आरती बर्मा, सुरज नेपाली, जगदिश साहनी, मोहनी बालमिकी र बिद्या बर्माले अभिनय गर्नुभएको थियो ।
सचेतनामुलक अभियानमा वडा नं ६ का वडा अध्यक्ष प्रेमपाल सिंह, वडा सचिव जीवनलाल यादव, स्थानीय समाजसेवी, स्याक नेपालका त्रिभुवन प्रसाद यादवको उपस्थिति रहेको थियो ।
पछिल्लो समय ढाँटेर बाल विवाह गर्ने गरिएको छ । बाल विवाह हुन लागेको भनेर अभियान्ता, प्रहरी घट्नास्थलमा पुग्दा अन्य धार्मिक कार्य हुने गरेको वा उमेर पुगेको व्यक्तिको विवाह हुन लागेको भनेर देखाउने गरेका छन् ।
प्लान इन्टरनेशनल नेपालले बाँके जिल्लामा बालविवाह सम्बन्धी गरेको प्रारम्भिक सर्वेक्षण, २०१९ अनुसार नरैनापुर गाउँपालिकामा ६७.३७ प्रतिशत किशोरी र ६७.३७ प्रतिशत किशोरको १९ वर्षमुनि नै बिहे हुने गरेको छ ।
