नेपालगञ्ज । बाँकेको नरैनापुर गाउँपालिकास्थित सोनवर्षामा तटबन्ध बनाउन स्थानीयले माग गरेका छन् । सोनवर्षामा तटबन्ध नहुँदा आसपासका ६ वटा गाउँ डुबानको उच्च जोखिममा रहेका छन् ।
तटबन्ध निर्माणका क्रममा स्थानीय केहीको विरोधपछि सोनवर्षाको एक ठाउँमा तटबन्ध बन्न सकेको छैन । त्यही स्थानमा तटबन्ध बनाउन स्थानीय मोल्हे धोवीले माग गर्नुभएको छ । उहाँले तत्काल त्यहाँ तटबन्ध बनाइदिन गुहार माग्दै नेपालगञ्जको जनताको तटबन्ध कार्यालयसंग माग गर्नुभएको हो ।
बाढी आइहालेमा जनताको तटबन्धले के गर्ने तयारी गरेको छ भन्ने बुझ्न लक्षणपुर बाँध पीडित संघर्ष समितिका सचिव राजकुमार शुक्ला, सदस्य दुर्गाप्रसाद पाण्डे पनि जनताको तटबन्ध कार्यालयमा पुग्नुभएको छ । बाढी रोक्न जनताको तटबन्ध कार्यालयले राप्ती नदीमा १७.५ किलोमिटर तटबन्ध बनाएको छ ।
तटबन्ध कार्यालयका इन्जिनियर महेशराज श्रेष्ठले बोरा र नाइलन जाली तयारी अवस्थामा रहेको र तत्काल अस्थायी तटबन्ध बनाइदिने भनेको संघर्ष समितिका सचिव शुक्लाले जानकारी दिनुभयो ।
