कोहलपुर । कोहलपुर नगरपालिकाका ६ वटा स्वास्थ्य संस्थाहरुको क्षमता पहिचान (लेखाजोखा) गरिएको छ । विश्व स्वास्थ्य संगठन र यूनिसेफले तयार गरेको वास फिट टुल प्रयोग गरेर उक्त लेखाजोखा गरिएको हो ।
कोहलपुर नगरपालिकाको समन्वय, वास एस डि जिको साझेदारीमा गेरुवा ग्रामीण जागरण संघद्वारा संचालित वास इन हेल्थ (स्वास्थ्य संस्थामा खानेपानी, सरसफाइ र स्वच्छता प्रवद्र्धन) परियोजनामार्फत स्वास्थ्य संस्थामा पानी, सरसफाइ, स्वच्छता र व्यवस्थापनका मुख्य ४ क्षेत्रका ६४ वटा सूचकका आधारमा क्षमता लेखाजोखा गरिएको छ ।
स्वास्थ्य संस्था सन्चालन तथा व्यवस्थापन समिति र वास फिट समितिका सदस्यहरुले सहभागितामूलक छलफल गरेर हरेक मापदण्ड पुरा गरेको सूचकलाई तीन वटा तारा, मापदण्ड आंशिक रुपमा पुरा गरेकालाई दुई वटा तारा र मापदण्ड पुरा नगरेका सूचकलाई एक तारा दिएका थिए ।
आधारभूत स्वास्थ्य सेवा केन्द्र कोहलपुर–१ कौशिलानगर, रझेना स्वास्थ्य चौकी कोहलपुर–४ मदनचोक, आधारभूत स्वास्थ्य सेवा केन्द्र कोहलपुर–५ शान्तिनगर, आधारभूत स्वास्थ्य सेवा केन्द्र कोहलपुर–१३ रानिघाट र समशेरगन्ज स्वास्थ्य चौकी कोहलपुर–१५ शमशेरगन्जको लेखाजोखा गरिएको हो ।
स्वास्थ्य संस्थाहरुको अवस्था निकै नाजुक रहेको प्रारम्भिक तहको जानकारी आएको र यो लोखाजोखाले के ? के ? मा सुधार गर्ने स्पष्ट गरेको गेरुवाका कार्यकारी निर्देशक हरि सुवेदीले जानकारी दिनुभएको छ ।
उहाँले लेखाजोखा गरिएका स्वास्थ्य संस्थाहरुको विद्यमान अवस्थाका बारेमा सम्बन्धित स्वास्थ्य संस्था संचालन तथा व्यवस्थापन समिति, वडा कार्यपालिका र गाउँ, नगरपालिकाहरुसँग छिट्टै छलफल गरिने र सुधारका लागि पहल थालिने बताउनुभयो ।
