बर्दिया । जिल्लामा पहिलो पटक सुरक्षाकर्मी र निजामति कर्मचारीमा कोरोना संक्रमण पुष्टि भएको छ ।
कोरोना नियन्त्रणमा खटिएका स्वास्थ्यकर्मी, सुरक्षाकर्मी र कर्मचारीमा संक्रमण पुष्टि भएको हो ।
शनिबार कोरोना संक्रमण पुष्टि भएका दश जनामध्ये दुई जना सुरक्षाकर्मी र एक जना नगरपालिकाको निजामति कर्मचारीमा कोरोनाको संक्रमण देखिएको ठाकुरबाबा नगरपालिकाका स्वास्थ्य शाखा प्रमुख इन्द्र राजबंशीले जानकारी दिनुभयो ।
उहाँका अनुसार यसबाहेक क्वारेन्टिनमा बसेका चार जना र तीन जना स्वास्थ्यकर्मीमा संक्रमण पुष्टि भएको छ ।
जिल्लामै पहिलो पटक सुरक्षाकर्मी र कर्मचारीमा कोरोना देखिएको स्वास्थ्य कार्यालय बर्दियाका जनस्वास्थ्य निरिक्षक कृष्ण गोपाल चौधरीले बताउनुभयो ।
यसअघि जिल्लामा स्वास्थ्यकर्मी र सवारी चालकमा कोरोना पुष्टि भइसकेको छ ।
यसैबीच एकै दिन दश जनामा कोरोना संक्रमण पुष्टि भएपछि नगरपालिकाको आकस्मिक बैठकबाट नगरपालिका कार्यालय र ९ वटै वडा कार्यालयबाट हुने आकस्मिक बाहेक सबै सेवा तीन दिनका लागि बन्द गरिएको छ ।
#कोरोना #बर्दिया
